ഐ.എസ്.ആര്.ഒ 'യുവിക' മേയ് 19 മുതല് 30 വരെ
ഒൻപതാം ക്ലാസ് വിദ്യാർഥികള്ക്ക് ഐ.എസ്.ആർ.ഒയുടെ 'യുവിക-യങ് സയൻറിസ്റ്റ് പ്രോഗ്രാമില് പങ്കെടുക്കാം. ബഹിരാകാശ ശാസ്ത്ര-സാങ്കേതിക വിദ്യയിലും പ്രായോഗിക തലങ്ങളിലും അറിവ് പകരുക; സയൻസ്, ടെക്നോളജി, എൻജിനീയറിങ്, മാത്തമാറ്റിക്സ് (സ്റ്റെം) ഗവേഷണാധിഷ്ഠിത പഠനത്തിലേക്കും കരിയറിലേക്കും വിദ്യാർഥികളെ പ്രോത്സാഹിപ്പിക്കുക മുതലായവ ലക്ഷ്യത്തോടെയാണ് മേയ് 19 മുതല് 30 വരെ പ്രോഗ്രാം സംഘടിപ്പിക്കുന്നത്.
വിക്രംസാരാഭായ് സ്പേസ് സെന്റർ തിരുവനന്തപുരം, സതീഷ്ധവാൻ സ്പേസ് സെന്റർ ശ്രീഹരിക്കോട്ട, യു.ആർ. റാവു സാറ്റലൈറ്റ് സെന്റർ ബംഗളൂരു, സ്പേസ് ആപ്ലിക്കേഷൻസ് സെന്റർ അഹ്മദാബാദ്, നാഷനല് റിമോട്ട് സെൻസിങ് സെന്റർ ഹൈദരാബാദ്, നോർത്ത് ഈസ്റ്റേണ് സ്പേസ് ആപ്ലിക്കേഷൻസ് സെന്റർ ഷില്ലോങ്, ഇന്ത്യൻഇൻസ്റ്റിറ്റ്യൂട്ട് ഓഫ് റിമോട്ട് സെൻസിങ്, ഡറാഡൂണ് എന്നിവിടങ്ങളിലാണ് പഠന പരിശീശലന ക്ലാസുകള് അടക്കം പ്രോഗ്രാം ആസൂത്രണം ചെയ്തിട്ടുള്ളത്.
യുവിക പ്രോഗ്രാമിന്റെ വിശദാംശങ്ങള് https://jigyasa.iirs.gov.in/yuvika ല് ലഭിക്കും. താല്പര്യമുള്ള വിദ്യാർഥികള്ക്ക് മാർച്ച് 23 വരെ രജിസ്റ്റർ ചെയ്യാം. തെരഞ്ഞെടുക്കപ്പെടുന്നവരുടെ ലിസ്റ്റ് ഏപ്രില് ഏഴിന് പ്രസിദ്ധപ്പെടുത്തും.
ഇ-മെയിലില് ഐ.എസ്.ആർ.ഒയുടെ അറിയിപ്പ് ലഭിക്കുന്നവർ മേയ് 18ന് ബന്ധപ്പെട്ട സെന്ററില് റിപ്പോർട്ട് ചെയ്യണം. എട്ടാം ക്ലാസ് മാർക്ക്, ഓണ്ലൈൻ ക്വിസിലെ പ്രകടനം, കഴിഞ്ഞ മൂന്നു വർഷങ്ങളിലെ ശാസ്ത്രമേള പങ്കാളിത്തം, ഒളിമ്ബ്യാർഡ് റാങ്ക്, സ്പോർട്സ് മത്സരങ്ങളിലെ വിജയം, സ്കൗട്ട് ആൻഡ് ഗൈഡ്/എൻ.സി.സി/എൻ.എസ്.എസ് അംഗത്വം, ഗ്രാമീണ സ്കൂള് വിദ്യാഭ്യാസം എന്നിവ പരിഗണിച്ചാണ് തെരഞ്ഞെടുപ്പ്.
പ്രോഗ്രാമില് പങ്കെടുക്കുന്നവരുടെ യാത്രാക്കൂലി (ട്രെയിൻ/വോള്വോ ഫെയർ) കോഴ്സ് മെറ്റീരിയല്സ്, താമസം മുതലായ മുഴുവൻ ചെലവുകളും ഐ.എസ്.ആർ.ഒ വഹിക്കും. കൂടുതല് വിവരങ്ങള്ക്കും അപ്ഡേറ്റുകള്ക്കും വെബ്സൈറ്റ് സന്ദർശിക്കേണ്ടതാണ്. അന്വേഷണങ്ങള്ക്ക് yuvika@isro.gov.in എന്ന ഇ-മെയിലില് ബന്ധപ്പെടാം.
